Út í kött!
Út í kött!
Sviðssetning
Lýðveldisleikhúsið
Sýningarstaður
Gerðuberg
Frumsýning
26. maí 2009
Tegund verks
Dans- og söngleikur ætlaður börnum
Lýðveldisleikhúsið frumsýnir nýtt íslenskt leikverk fyrir börn í Gerðubergi. Þetta er dans- og söngleikur sem ber nafnið Út í kött! og fjallar um tvo krakka og ferðalag þeirra um tölvu og ævintýraheima. Þessi ævintýraleikur er fyrir börn á aldrinum fjögurra til tólf ára en fullorðnir ættu líka að hafa gaman að þessu fjöruga verki. Leikin atriði mynda skemmtilega umgjörð utan um söng- og dansatriði þar sem ævintýrapersónur í litríkum búningum bregða á leik.
Leikritið fjallar um strákinn Erp sem neyðist til að taka á móti dóttur vinafólks foreldra sinna inn í herbergið sitt. Helga Soffía er hress og hraðlýgin og kann frá mörgu undarlegu að segja. Erpur á erfitt með að sætta sig við þennan gest sinn, enda snýr hún heimi hans, þar sem hetjur teiknimynda og tölvuleikja eru karlmenn, á hvolf. Með fjörugu ímyndunarafli sínu nær hún að sýna honum að tilveran þarf ekki að vera niðurnjörvuð í fyrirfram ákveðin hólf og kassa. Sögur Helgu Soffíu eru þrjú Grimms-ævintýri byggð á útgáfum Roalds Dahl og fléttast þau inn í leikverkið með tónlist, dansi og söng. Þar birtast Rauðhetta, Öskubuska, prins, úlfar og grísir en Rauðhetta er enginn ráðvilltur sakleysingi sem lætur éta sig mótþróalaust og Öskubuska áttar sig á að hamingjan felst ekki í því einu að vera fótnett og fríð.
Tvö tólf ára börn fara með hlutverk Erps og Helgu Soffíu, þau Fannar Guðni Guðmundsson og Sóley Anna Benónýsdóttir, Ragnheiður Árnadóttir söngkona fer með hlutverk sögumanns, og leikararnir og dansararnir Guðmundur Elías Knudsen og Kolbrún Anna Björnsdóttir fara með hlutverk geimskrímsla og ýmsra ævintýrapersóna t. d. Rauðhettu og úlfsins og Öskubusku og prinsins, en Kolbrún er einnig leikstjóri. Benóný Ægisson er höfundur handrits, semur tónlistina og þýðir kvæði Roald Dahl, Sigríður Ásta Árnadóttir gerir búningana en Kristrún Eyjólfsdóttir leikmyndina.
Í ævintýraleiknum Út í kött! er staðalmyndunum gefið langt nef og hláturinn notaður til að opna augu áhorfenda fyrir því að heimurinn er ekki eins svart/hvítur og hann sýnist. Það er mikilvægt, í allri þeirri fjölbreyttu flóru skemmtana sem standa börnum til boða, að þau geti einnig séð sýningu sem vekur þau til umhugsunar um viðtekin gildi. Á Íslandi er félagslegt jafnrétti langt á veg komið en á sama tíma eru skilaboðin sem börnin okkar fá úr umhverfinu og úr fjölmiðlum vægast sagt tvíræð. Stelpur eiga að vera sætar, undirgefnar og óvirkar en strákarnir eiga að vera ofurvirkar hetjur. Í þessu verki er staðalmyndum kynjanna hins vegar kollvarpað og viðteknum gildum ögrað.
Höfundur
Benóný Ægisson
Kvæði eftir
Roald Dahl
Leikstjórn
Kolbrún Anna Björnsdóttir
Leikarar í aðalhlutverkum
Fannar Guðni Guðmundsson
Finnbogi Þorkell Jónsson
Guðmundur Elías Knudsen
Leikkonur í aðalhlutverkum
Heiða Árnadóttir
Kolbrún Anna Björnsdóttir
Ólöf Hugrún Valdimarsdóttir
Sóley Anna Benónýsdóttir
Leikmynd
Kristrún Eyjólfsdóttir
Búningar
Sigríður Ásta Árnadóttir
Lýsing
Benóný Ægisson
Tónlist
Benóný Ægisson
Hljóðmynd
Benóný Ægisson
Söngvari
Heiða Árnadóttir
Dansarar
Finnbogi Þorkell Jónsson
Guðmundur Elías Knudsen
Kolbrún Anna Björnsdóttir
Ólöf Hugrún Valdimarsdóttir
Sóley Anna Benónýsdóttir
Danshöfundur
Kolbrún Anna Björnsdóttir
