21 manns saknað

Sýningarstaður
Saltfiskssetrið 

Frumsýning
Október 2008 

Tegund verks
Einleikur 

Grindvíska Atvinnuleikhúsið mun frumsýna í lok október verkið 21 manns saknað. Það eru Grindvíkingarnir Bergur Þór Ingólfsson, Víðir Guðmundsson og Guðmundur Brynjólfsson sem stofnuðu leikfélagið og eru þeir einnig leikritahöfundar verksins, sem byggir á epískri ævi Séra Odds V. Gíslasonar.  21 MANNS SAKNAÐ verður sýnt í nýuppgerðu Flagghúsi í Grindavík.

Á seinni hluta nítjándu aldar, þegar stór hluti þjóðarinnar bjó enn í torfkofum og sjómenn réru á opnum bátum, var prestur suður í Staðarsókn í Grindavík sem ekki gat sætt sig við að Íslendingar stæðu utan við þá iðnbyltingu sem hafði átt sér stað í Evrópu. Þetta var séra Oddur V. Gíslason. Hann gat heldur ekki sætt sig við það að á einni vetrarvertíð yrðu 20 skipskaðar og níutíu drukknanir. Hann hafði samanburðinn vegna tíðra ferðalaga sinna til útlanda og ævi sína helgaði hann baráttunni við náttúruna, fátækt og Bakkus.

Þegar Oddur sótti sjóinn bað hann um að hvít ábreiða væri lögð út á þekju ef einhver þyrfti á presti að halda. Hann ferðaðist um landið endilangt til að predika um nauðsyn þess að hafa um borð í bátum allan þekktan björgunar- og slysavarnabúnað. Jafnvel henti hann hásetum útbyrðis til að sýna þeim hversu nauðsynlegt það væri að læra að synda. Honum hefur verið lýst sem ,,mesta braskmenni sinnar samtíðar" vegna þess fjölda verkefna sem hann tók sér fyrir hendur: Lýsisbræðsla í Höfnum, brennisteinsnámur í Krýsuvík, kolanámur við Hreðarvatn, fyrsta kennslubók í ensku fyrir Íslendinga... en aldrei hélst honum á peningum.

Það sem honum hinsvegar heppnaðist var að vekja Íslendinga til vitundar um að dauðinn og sjórinn væru ekki óaðskiljanlegir og að alltaf er hægt að fá meiri verðmæti út úr aflanum. Maðurinn sem barðist við að bjarga heiminum allt sitt líf. Maðurinn sem stóð að frægasta brúðarráni síðustu alda á Íslandi. Maðurinn sem lagði grunninn að slysavörnum á Íslandi - dó síðan í sárri fátækt í landnemabyggðum Kanada.

Leikritið er einleikur þar sem Víðir Guðmundsson fer með öll hlutverk ásamt því að leggja út frá sögunni frá eigin brjósti.

Leikstjóri
Bergur Þór Ingólfsson 

Leikari í aðalhlutverki
Víðir Guðmundsson 

Leikmynd
Eva Vala Guðjónsdóttir

Búningar
Eva Vala Guðjónsdóttir

Lýsing
Þorsteinn Sigurbergsson