Grímuhátíðin 2008 í fögru Þjóðleikhúsi

GRÍMUHÁTÍÐIN, árleg uppskeru- og verðlaunahátíð sviðslista, fór fram í sól og sumaryl föstudaginn 13. júní í Þjóðleikhúsinu. Leikhús þjóðarinnar skartaði sínu fegursta en vinnupallar hafa verið fjarlægðir og glitrandi hrafntinnu-klæðning prýðir nú þessa sögufrægu byggingu við Hverfisgötuna. Að lokinni veislu í Kristalssalnum var gestum boðið til sætis.

Mikil eftirvænting var í salnum og biðu gestir spenntir eftir afhendingunni á Stóra sviðinu því aldrei höfðu fleiri verk komið til álita, eða alls 80 sviðsverk og 13 útvarpsverk.

Bein útsending í Sjónvarpinu hófst kl 21 með litskrúðugu atriði úr söngleiknum Ástin er diskó, lífið er pönk. Ungfrú Hollywood var kjörin og að því búnu afhentu Tinna Gunnlaugsdóttir þjóðleikhússtjóri og Páll Magnússon útvarpsstjóri fyrstu verðlaun kvöldsins.

Kynnar kvöldsins, leikararnir Guðjón Davíð Karlsson og Jóhannes Haukur Jóhannesson, eða Jói og Gói, eins og þeir eru jafnan kallaðir fóru á kostum og skemmtu gestum með óborganlegum skemmtiatriðum. Félagarnir vildu nýta tækifærið, þar sem leikhússtjórar landsins voru í salnum og setja fram eigin hugmyndir að nýjum söngleikjum.

Fyrsta atriði þeirra félaga var úr söngleiknum Konungur ljónanna, Lion King, þar sem þeir brugðu sér í hlutverk frumskógardýra, annað atriðið var úr frumsömdum friðarsöngleik á sjö tungumálum, þar sem heill barnakór birtist óvænt á sviðinu en það var þriðja atriðið sem sló í gegn; eftirlíking af lokadansinum fræga úr söngleiknum Í djörfum dansi, Dirty Dancing.

Í því atriði var engu líkara en salurinn ætlaði að farast úr hlátri, svo góð voru viðbrögð áhorfenda við þessari tillögu. Gestir voru hreinlega ekki á því að sleppa þeim Jóa og Góa af sviðinu. Í lokin fengu þeir svo aðstoð grænna sviðsmanna sem komu í stað flókinna tæknibrellna og engu líkara var en að Gói svifi í lausu lofti um sviðið. Það verður svo spennandi að sjá hvort eitthvað af þessum söngleikjum rati á svið á næsta leikári.

Fjölmörg atriði úr sýningum vetrarins voru einnig á boðstólnum, m.a. úr söngleiknum Gosa, KK söng lagið Í eigin vanmætti úr leiksýningunni Fool 4 Love, Lay Low söng lagið Saman úr leiksýningunni Ökutímar, Sigrún Pálmadóttir óperusöngkona og Kurt Kopecky píanóleikari fluttu lagið La Danza eftir Rossini og Bryndís Ásmundsdóttir og hljómsveit Jóns Ólafssonar fluttu lagið Me and Bobby McGee úr söngleiknum Janis 27 sem frumsýndur verður í Óperunni í haust.

Alls voru veitt verðlaun í sextán flokkum sviðslista, auk áhorfendaverðlauna sem leiksýningin Fló á skinni hlaut. Sýning ársins 2008 var valin leiksýningin Hamskiptin í sviðssetningu Lyric Hammersmith, Vesturports og Þjóðleikhússins og barnasýning ársins 2008 var valin leiksýningin Gott kvöld í sviðssetningu Þjóðleikhússins.

Forseti Íslands Hr. Ólafur Ragnar Grímsson veitti heiðursverðlaun Leiklistarsambands Íslands en þau hlaut Þuríður Pálsdóttir söngkona, fyrir framúrskarandi ævistarf í þágu sönglistar. Í þakkarræðu sinni minntist Þuríður þeirra frumkvöðla er ruddu brautina í óperuflutningi á Íslandi; margir þeirra hafi verið stríðsflóttamenn en algjör himnasending fyrir sönglífið.

Að lokinni verðlaunaafhendingu héldu hátíðargestir niður í Leikhússkjallarann þar sem hið sjóðheita Grímuball fór fram, en ballið er árlega eitt heitasta sumarballið á mölinni. Leikhúsbandið frá Akureyri hélt uppi stuðinu á dansgólfinu fram á rauða sumarnóttina.

Sjaldan eða aldrei hafa eins mikil tilþrif sést á gólfinu, enda diskódansarar, pönkarar og síðast en ekki síst Íslenski dansflokkurinn samankomin á dansgólfinu auk helstu leikara landsins.

Ekki slæm blanda það!