100 boðsmiðar á Grímuhátíðina 2011

100 BOÐSMIÐAR fyrir þig á Grímuhátíðina 2011! Leiklistarsamband Íslands hefur ákveðið að gefa 100 boðsmiða fyrir almenna leikhúsgesti og þá sem hafa áhuga að taka þátt í fjörinu í salnum á Grímuhátíðinni 2011. Hátíðin sem verður glæsileg að vanda, verður haldin fimmtudaginn 16. júní í Borgarleikhúsinu, í beinni útsendingu á Stöð 2 og hefst með fordrykk kl. 18.30. Miðarnir verða gefnir þeim 50 gestum sem fyrst senda tölvupóst á miðasöluna í Borgarleikhúsinu. Tveir miðar á mann! Nú er um að gera að nota tækifærið, baða sig í kastljósinu, hitta sviðslistastjörnurnar og njóta kvöldsins í góðum félagsskap. Netfangið er midasala@borgarleikhus.is - Góða skemmtun!

Tilnefningar til Grímuverðlauna 2011

TILNEFNINGAR til Grímuverðlauna 2011 í alls 16 flokkum sviðslista voru kunngjörðar í Borgarleikhúsinu mánudaginn 6. júní að viðstöddum fjölda sviðslistafólks. Alls komu 80 leiklistarverkefni til álita til Grímunnar í ár sem voru skoðuð af fagnefndum Grímunnar með verðlaunin eftirsóttu í huga. Þar af voru 20 danssýningar, 11 barnasýningar og 7 útvarpsverk. Við verkin störfuðu yfir eitt þúsund listamenn, tæknifólk og starfsfólk leikhúsanna.

Fimm leiksýningar hlutu tilnefningar sem sýning ársins 2011; Allir synir mínir í sviðssetningu Þjóðleikhússins, Elsku barn í sviðssetningu Leikfélags Reykjavíkur og Borgarleikhússins, Fjalla-Eyvindur í sviðssetningu leikhópsins Aldrei óstelandi og Norðurpólsins, Fólkið í kjallaranum í sviðssetningu Leikfélags Reykjavíkur og Borgarleikhússins og Lér konungur í sviðssetningu Þjóðleikhússins.

Fimm barnasýningar hlutu tilnefningar sem barnasýning ársins 2011; Ballið á Bessastöðum í sviðssetningu Þjóðleikhússins, Gilitrutt í sviðssetningu Brúðuheima, Gói og Eldfærin í sviðssetningu Baunagrassins og Borgarleikhússins, Herra Pottur og ungfrú Lok í sviðssetningu Óperartic í samstarfi við Listahátíð í Reykjavík og Þjóðleikhúsið og Hvað býr í pípuhattinum? í sviðsetningu Krílisins.

Áhorfendaverðlaunin eru veitt þeirri sýningu sem áhorfendum þótti skara framúr á leikárinu og fór netkosning fram á visir.is. Eftirfarandi fimm sýningar urðu efstar í kosningunni: Gói og Eldfærin í sviðssetningu Baunagrassins og Borgarleikhússins, Húsmóðirin í sviðssetningu Vesturports og Borgarleikhússins, Nei, ráðherra! í sviðssetningu Leikfélags Reykjavíkur og Borgarleikhússins, Rocky Horror í sviðssetningu Leikfélags Akureyrar og Strýhærði Pétur í sviðssetningu Leikfélags Reykjavíkur og Borgarleikhússins. Símakosning um áhorfendaverðlaunin 2011 hefst nokkrum dögum fyrir Grímuhátíðina og eru leikhúsáhorfendur hvattir til hringja inn og velja sína uppáhalds sýningu.

Ása Richardsdóttir, forseti Leiklistarsambands Íslands og annar kynnir Grímuhátíðarinnar í ár, leikkonan góðhjartaða Katla Margrét Þorgeirsdóttir, opinberuðu tilnefningarnar við góðar undirtektir samstarfsfélaga og ný-tilnefndra listamanna sem sýndu viðbrögð. Hinn aðalkynnir hátíðarinnar í ár verður leikarinn bráðskemmtilegi Gunnar Hansson.

Grímuhátíðin sjálf, árleg uppskeruhátíð sviðslistageirans árið 2011, verður svo haldin í níunda sinn í Borgarleikhúsinu fimmtudaginn 16. júní og í beinni útsendingu á Stöð 2. Útsendingin hefst stundvíslega kl. 19.30, en dagskráin nýtur ávallt mikilla vinsælda hjá sjónvarpsáhorfendum, enda um einn glæsilegasta viðburð ársins í menningarlífinu að ræða. Á hátíðinni verða jafnframt heiðursverðlaun Leiklistarsambands Íslands veitt þeim sviðslistamanni er þykir hafa skilað framúrskarandi ævistarfi í þágu sviðslista.

Lesa meira: Tilnefningar til Grímuverðlauna 2011

Tilnefningar opinberaðar 6. júní kl. 16

TILNEFNINGAR til Grímuverðlauna 2011 verða opinberaðar í Borgarleikhúsinu mánudaginn 6. júní kl. 16.00. Á athöfninni verður tilkynnt um hvaða sýningar og listamenn hljóta tilnefningar til verðlauna í alls 16 flokkum sviðslista. Til álita komu 80 sviðs- og útvarpsverk, þar af 20 danssýningar og 11 barnasýningar sem fagnefndir Grímunnar skoðuðu með verðlaunin eftirsóttu í huga. Allir eru velkomnir á athöfnina.

Einnig verður tilkynnt um hvaða fimm sýningar keppa til úrslita um Áhorfendaverðlaunin 2011, en þau verðlaun hlýtur sú sýning sem leikhúsgestum þótti skara framúr á leikárinu sem besta sýningin.

Kosning um áhorfendaverðlaunin er hafin á visir.is og stendur yfir til sunnudagsins 5. júní. Allir leikhúsáhugamenn eru hvattir til að taka þátt og velja uppáhálds sýninguna sína. Smelltu HÉR til að taka þátt.

Grímuhátíðin sjálf, árleg uppskeruhátíð sviðslistageirans árið 2011, verður svo haldin í níunda sinn í Borgarleikhúsinu fimmtudaginn 16. júní og í beinni útsendingu á Stöð 2. Á hátíðinni verða jafnframt heiðursverðlaun Leiklistarsambands Íslands veitt þeim sviðslistamanni er þykir hafa skilað framúrskarandi ævistarfi í þágu sviðslista.

Aðalkynnar hátíðarinnar verða leikararnir góðhjörtuðu og bráðskemmtilegu Gunnar Hansson og Katla Margrét Þorgeirsdóttir, en auk þeirra mun fjöldi íslenskra sviðsstjarna baða sig í kastljósunum. Leikarar, dansarar og aðrir þekktir sviðslistamenn koma fram á hátíðinni, sem árlega er ein sú allra glæsilegasta í menningarlífi landsins. Missið ekki af Grímuhátíðinni 2011.